SHOLAWAT CINTA

Kabar

"Sebenernye ada nyang pengen Aye omongin nih, Kong ! Tapi Aye masih sangsi, apa pantes ye Aye omongin sama Engkong.." Arifin yang sedang menikmati suasana sore dipelataran Musholla bersama sahabat seniornya itu terlihat ragu-ragu menceritakan kabar yang diterimanya.

"Heh, tumbenan Lu ngomong pake ng'rem segala ? Nape ? Kagak usah basa-basi deh ! Urusan apa nyang mao diomongin ? " Kong Mamat malah terkekeh melihat raut wajah gelisahnya Arifin.

"Entu Kong, Kemaren si Ahmad nelpon Aye.."

"Ehh, Apa kabarnye tuh bocah ? Masih jadi keamanan di bandara ?

"Alhamdulillah bae, Kong ! Dia lagi cuti, mudik ke rumah mertuanye di Surabaya.."

"Hooh ye, Adek Lu entu udeh jadi Wong Jowo..Hehehe, Entu Dia bekabar apa ?

"Nah eni nyang Aye kagak abis pikir.." Arifin nampak menghela napas pendek dan terlihat ragu untuk berbicara.

"Nape ? pegimane maksodnye ? "Kong Mamat malah menjadi penasaran saat melihat ekspresi ragu-ragu itu.

"Emm, Jadi begini Kong, si Ahmad ketemu sama si Boy di bandara Surabaya, tapi waktu disamperin malah pura-pura kagak kenal.."

"ilokan ? Sepa amat tuh bocah ? Panan udeh lama kenal ?

"Mangkenye si Ahmad jadi bingung, ilokan si Boy lupa sama Dia ? Panan udeh sering ketemu ?

"Bener-bener kagak ngenalin pisan ?

"Lah Ho'oh ! malahan langsung pegih sama cewe...parahnye lagi, Si Boy manggil tuh cewe mesra bener, pake bekata "Ayo istriku, jangan berbicara dengan orang asing "

"Pejajaran ! Mati kipeh tuh bocah ! Berani maen serong dibelakang cucu gua ? "Seketika napas Kong Mamat berderu hebat menahan amarahnya hingga aura wajahnya berubah sengit.

"Sabar Kong ! Jangan esmosi dulu ! Aye masih nunggu kabar dari si Ahmad, Dia juga kagak yakin kalo tuh cewe beneran bininye si Boy.." Sudah pasti Arifin menyadari akibat dari penjelasannya itu yang bakal memicu murkanya Kong Mamat.

"Iye sih, Tapi Aye sih kagak percaya kalo Si Boy berani maen serong, panan kita tau pegimane kelakuannye swaktu dedemenan sama Siti.." Arifin berusaha menenangkan Kong Mamat dengan mengingatkan kenangan perjuangan Boy mendapatkan Siti.

"Tapi tuh bocah tengik berani ngakuin wadon entu bininye ?

"Nah entu nyang bikin Aye bingung..

"Terus si Ahmad ngomong apalagi ?

"Dia kagak sempet ngikutin si Boy lantaran anak bininye udeh kesem-sem pengen ngelongok Emaknye.."

"Ckk, Kalo ampe beneran tuh kabar, Gua bakal tebas kerongkongan bocah tengik entu.."

"Haishh..Jangan Su'udzon dulu, Kong ! jangan gegabah ! Kite tunggu kabar dari si Ahmad dulu deh ! Kalo bisa, jangan ceritain sama sape-sape dulu, Kite cari kejelasannye dari si Boy.."

"Ckk, Huuhf..Badan gua ampe gemeter denger kabar kayak gini, Gua jadi kesel banget.."

"Sabar Kong ! istighfar ! Lagian pan belon tentu bener, Aye cerita sama Engkong cuma lantaran Aye watir sama kabar entu"

"Ckk, Mana cucu gua lagi bunting, Haish pegimane jadinye kalo ampe Siti tau kabar eni.."

"Jangan ampe deh ! Kite kudu adem, Kong ! kalo bisa mah, Bang Jali sama Mpok Romlah juga jangan dikasih tau dulu !"

"Hemm..."Kong Mamat hanya sedikit menganggukan kepalanya namun raut wajahnya yang sengit itu tetap menunjukan kemarahannya.

"Semoga aje gua kagak salah langkah ceritain perkara eni sama si Engkong, Gua yakin Si Boy kagak bakal betingkah nyang modelan kayak gitu.." Huuhfh..."Arifin nampak menghela napas menyadari raut wajah tak bersahabat partner tua dihadapannya itu.